سکھر میں ڈاکٹر کی گاڑی پر فائرنگ، ٹیکنیشن جاں بحق — ڈاکٹر کو دل کا دورہ
عدنان اطہر
سکھر میں ڈاکٹر کی گاڑی پر فائرنگ، ٹیکنیشن جاں بحق — ڈاکٹر کو دل کا دورہ
سکھر سکھر میں آج ایک افسوسناک واقعے میں معروف ڈاکٹر کرپل داس پر قاتلانہ حملہ کیا گیا۔ واقعہ سکھر بیراج کے قریب پیش آیا، جہاں نامعلوم مسلح افراد نے ان کی گاڑی پر اندھا دھند فائرنگ کر دی۔
ذرائع کے مطابق، حملے کے وقت ڈاکٹر کرپل داس اپنی ٹیم کے ہمراہ فیلڈ میں موجود تھے۔ فائرنگ کے نتیجے میں ان کی ٹیم کے ایک اہم رکن، ٹیکنیشن وزیر بوہار کو گولی لگی، جو سر میں زخم آنے کے باعث موقع پر ہی جاں بحق ہو گئے۔
ڈاکٹر کرپل داس جسمانی طور پر فائرنگ سے محفوظ رہے، تاہم اس ہولناک واقعے کے بعد انہیں شدید صدمہ پہنچا اور وہ دل کے دورے کا شکار ہو گئے۔ انہیں فوری طور پر قریبی اسپتال منتقل کیا گیا، جہاں ان کا علاج جاری ہے۔ ڈاکٹروں کے مطابق ان کی حالت اب خطرے سے باہر ہے۔
پولیس کے مطابق حملہ آور موقع سے فرار ہو چکے ہیں اور واقعے کی تحقیقات کا آغاز کر دیا گیا ہے۔ جائے وقوعہ سے شواہد اکٹھے کر کے مقدمہ درج کر لیا گیا ہے۔
علاقے میں خوف و ہراس پھیل گیا ہے اور عوام نے سیکیورٹی میں بہتری کا مطالبہ کیا ہے۔ ڈاکٹر کرپل داس کی سروسز کے باعث انہیں علاقے میں خاص مقام حاصل ہے، اور ان پر حملے نے شہریوں کو شدید غمزدہ کر دیا ہے۔
