پی سی بی نے 2025-26 سیزن کے لیے میچ آفیشلز پینل کا اعلان کر دیا

چہرہ ڈیسک

14:29 2025, 7 October

لاہور — پاکستان کرکٹ بورڈ (پی سی بی) نے 2025 اور 2026 کے سیزن کے لیے میچ آفیشلز کے نئے پینل کا اعلان کر دیا ہے، جس میں بین الاقوامی، ایلیٹ، سپلیمنٹری اور ایمرجنگ سطح کے آفیشلز شامل ہیں۔

پی سی بی کے مطابق انٹرنیشنل پینل میں علی نقوی کو میچ ریفری مقرر کیا گیا ہے، جبکہ امپائرز میں آصف یعقوب، فیصل آفریدی، راشد ریاض اور سلیمہ امتیاز شامل ہیں۔

ایلیٹ پینل میں 18 امپائرز اور 10 میچ ریفریز شامل کیے گئے ہیں، جو قومی سطح پر اہم میچز کی نگرانی کریں گے۔ امپائرز کی کارکردگی کو مزید باریکی سے جانچنے کے لیے سپلیمنٹری پینل کو دو حصوں میں تقسیم کیا گیا ہے: سپلیمنٹری ون میں 14 اور سپلیمنٹری ٹو میں 24 امپائرز شامل ہیں۔ میچ ریفریز کے سپلیمنٹری پینل میں بھی 10 ریفری شامل کیے گئے ہیں۔

ایمرجنگ پینل میں ملک بھر سے 40 امپائرز کو منتخب کیا گیا ہے، جنہیں مستقبل کے لیے تیار کیا جائے گا۔ اس پینل میں خواتین کی شمولیت کو بھی ترجیح دی گئی ہے، اور سلیمہ امتیاز سمیت 13 خواتین امپائرز کو شامل کیا گیا ہے۔

پی سی بی کا کہنا ہے کہ یہ پینل میرٹ، کارکردگی اور تربیت کے جدید معیار کو مدنظر رکھتے ہوئے تشکیل دیا گیا ہے، تاکہ قومی اور بین الاقوامی سطح پر میچ آفیشلز کی صلاحیتوں کو مزید بہتر بنایا جا سکے۔