چہرہ نیوز | اردو

سورج آج بھی سندھ کی زمین پر آگ برسا رہا تھا۔ گرمی ایسی تھی کہ سائے بھی پناہ مانگتے پھرتے تھے، مگر اس تپتی دھوپ کے نیچے کچھ لوگ کئی دنوں سے بیٹھے تھے۔ ان کے پاس نہ کوئی اقتدار تھا، نہ دولت، نہ سفارش، نہ اسلحہ۔ ان کے ہاتھوں میں صرف تصویریں تھیں... ان چہروں کی تصویریں جو کبھی ان کے گھروں کی رونق تھے، مگر اب صرف یادوں کے مکین رہ گئے تھے۔

اس احتجاجی کیمپ کا نام "شامِ غریباں"رکھا گیا تھا۔

یہ صرف ایک نام نہیں تھا، بلکہ ہر اس ماں کی شام تھی جس کی گود برسوں سے خالی ہے، ہر اس باپ کی رات تھی جو ہر آہٹ پر چونک کر دروازے کی طرف دیکھتا ہے، ہر اس بہن کی خاموشی تھی جو ہر عید پر اپنے بھائی کے لیے نئے کپڑے سنبھال کر رکھ دیتی ہے، اور ہر اس بچے کا انتظار تھا جو شاید آج بھی کسی اندھیرے کمرے میں اپنی ماں کو یاد کرتا ہوگا۔

وہاں بیٹھی ایک بوڑھی ماں اپنی بیٹی کی تصویر کو بار بار چومتی تھی۔ اس کی آنکھوں سے آنسو خشک ہو چکے تھے، مگر امید ابھی زندہ تھی۔ وہ دھیرے سے کہتی:

"بیٹی... دیکھ، میں آج بھی تیرے انتظار میں بیٹھی ہوں۔ اتنے برس گزر گئے، مگر میرے دروازے کی کنڈی آج بھی تیرے لیے کھلی ہے۔ ایک بار لوٹ آ... صرف ایک بار۔"

کچھ فاصلے پر ایک سفید داڑھی والا بوڑھا باپ خاموش بیٹھا تھا۔ اس کے ہاتھ کانپ رہے تھے۔ وہ کسی سے شکوہ نہیں کرتا تھا، بس آسمان کی طرف دیکھ کر اتنا کہتا:

"یا اللہ! میری سانسیں ختم ہونے سے پہلے ایک بار میرے بچے کو میرے سامنے لے آ۔"

یہ الفاظ سن کر لگتا تھا جیسے وقت بھی رونے لگا ہو۔

شدید گرمی میں عورتوں کی سب سے بڑی تعداد اس احتجاج میں شریک تھی۔ ان کے ساتھ ننھے بچے بھی تھے، جنہیں شاید ابھی یہ بھی معلوم نہیں تھا کہ ان کے ہاتھوں میں جس تصویر کو وہ پکڑے ہوئے ہیں، وہ ان کا بھائی ہے، بہن ہے یا باپ۔ بھوک تھی، غربت تھی، بے بسی تھی، مگر سب سے زیادہ ایک سوال تھا...

"ہمارے بچے کہاں ہیں؟"

یہ سوال کئی دنوں تک سندھ کی فضا میں گونجتا رہا، مگر اقتدار کے ایوانوں تک اس کی بازگشت نہ پہنچی۔

پھر ایک صبح ریاست آ گئی۔

وہ ریاست، جو برسوں سے لاپتہ بچوں کو تلاش نہ کر سکی، چند لمحوں میں احتجاجی کیمپ تک پہنچ گئی۔

لاٹھیاں چلیں۔

خواتین کو گھسیٹا گیا۔

بزرگوں کی عزت پامال ہوئی۔

زمین پر گری ہوئی تصویریں دھول میں لتھڑ گئیں۔

اور "شامِ غریباں" کا کیمپ طاقت کے زور پر ختم کر دیا گیا۔

احتجاج کرنے والوں میںساحل جوگی، لیاقت جلبانی اور سہنی پارس کو گرفتار کر لیا گیا۔

لیکن سوال پھر بھی آزاد رہا۔

بچے کہاں ہیں؟

ان تصویروں کا کیا قصور تھا؟

ان ماؤں کی دعاؤں کا جرم کیا تھا؟

ان بوڑھے باپوں کی امیدوں سے ریاست کو اتنا خوف کیوں محسوس ہوا؟

کاش طاقت کا یہی مظاہرہ ان ہاتھوں کے خلاف بھی ہوتا جو بچوں کو غائب کرتے ہیں۔

کاش پولیس کی یہی تیزی ان معصوموں کو ڈھونڈنے میں دکھائی دیتی۔

کاش حکومت کے کان ان ماؤں کی سسکیوں پر بھی اسی طرح کھلتے، جیسے احتجاج دیکھ کر فوراً کھل جاتے ہیں۔

سندھ میں بچوں کا لاپتہ ہونا اب حادثہ نہیں، معمول بنتا جا رہا ہے۔ یہ معمول صرف خاندانوں کو نہیں کھا رہا، یہ پورے معاشرے کا مستقبل نگل رہا ہے۔ جب ایک ریاست اپنے بچوں کو محفوظ نہ رکھ سکے، تو اس کی ترقی کے تمام دعوے کھوکھلے ہو جاتے ہیں۔

یہ احتجاج حکومت کے خلاف بغاوت نہیں تھا۔

یہ انسانیت کے حق میں ایک التجا تھی۔

یہ چند لوگوں کا دھرنا نہیں تھا، بلکہ ہزاروں گھروں کے ٹوٹے ہوئے خوابوں کا اجتماع تھا۔

کیمپ تو ختم کر دیا گیا، مگر کیا انتظار بھی ختم ہو گیا؟

کیا وہ ماں اب اپنی بیٹی کو یاد کرنا چھوڑ دے گی؟

کیا وہ بوڑھا باپ اب اپنے بیٹے کے لیے دعا مانگنا چھوڑ دے گا؟

کیا تصویریں اب اپنے لوگوں کو پکارنا چھوڑ دیں گی؟

ہرگز نہیں۔

جب تک ایک بھی بچہ لاپتہ ہے، ہر گلی میں ایک "شامِ غریباں" آباد رہے گی۔

اور تاریخ یہ ضرور لکھے گی کہ ایک دن حکومت نے احتجاج تو ختم کر دیا تھا، مگر ظلم کے خلاف اٹھنے والی آہ کو خاموش نہ کر سکی۔

حکمرانوں سے صرف ایک سوال ہے:

اگر ان تصویروں میں آپ کے اپنے بچوں کے چہرے ہوتے... اگر یہ سسکیاں آپ کے اپنے گھر سے اٹھ رہی ہوتیں... اگر یہ بوڑھا باپ آپ کا باپ اور یہ تڑپتی ماں آپ کی ماں ہوتی... تو کیا آپ بھی لاٹھی چلاتے، یا پورا نظام ان بچوں کو ڈھونڈنے کے لیے کھڑا کر دیتے؟

ضمیر ابھی بھی زندہ ہو تو اس سوال کا جواب ضرور دیجئے، کیونکہ ریاستیں طاقت سے نہیں، انصاف سے مضبوط ہوتی ہیں۔ اور جس سرزمین کے بچے ہی محفوظ نہ ہوں، وہاں صرف لوگ نہیں، انسانیت بھی لاپتہ ہو جاتی ہے