کراچی کی سینٹرل جیل میں قتل کیس کی سز اکاٹنے والے مجرم کا اعزاز

عرفان علی

16:25 2022, 14 January

کراچی کی سینٹرل جیل میں قتل کیس کی سز اکاٹنے والے مجرم کا اعزاز ۔انٹر میڈیٹ امتحان میں نمایاں کامیابی حاصل کرکے سب کو حیران کردیا۔۔۔آئی کیپ نے قابلیت کی بنیاد پر قیدی کو چارٹرڈاکاؤنٹنٹ بننے کے لئے اسکالر شپ کی پیشکش کردی۔۔۔اس ہونہار قیدی سے ملوارہے ہیں

جسم اسیر ہی سہی۔۔۔سوچ اور ذہن آزاد رہتے ہیں۔۔۔۔یہ جملہ سچ ثابت کردکھا یا ہے کراچی کی سینٹرل جیل میں قیداس تینتیس سالہ قیدی سید نعیم شاہ نے۔۔۔جسے جیل انتظامیہ نے تعلیم حاصل کرنے کی ترغیب دی تو ا س نوجوان قیدی نے سب کو پیچھے چھوڑ دیا۔

انٹر میڈیٹ امتحانات میں نمایاں نمبروں سے کامیابی حاصل کرنے والے قتل کیس میں سزا یافتہ سید نعیم شاہ کی اس وقت حیرت کی انتہاء نہ رہی،، جب اسے چارٹرڈ اکاؤنٹنٹ بننے کے لئے آئی کیپ نامی ادارے نے اسکالر شپ آفر کی

پابند سلاسل ہونے کے باوجود اپنی تعلیمی قابلیت کا لوہامنوانے والے اس قیدی نےجیل انتظامیہ کا سر بھی فخر سے بلند کردیا ہے، جیل انتظامیہ کا کہنا ہے کہ سید نعیم شاہ کی غیر معمولی کامیابی جیل میں قیدیوں کو دی جانے والی بہتر تعلیم کی واضح دلیل ہے۔

25برس قید کی سزا کاٹنے والا سید نعیم شاہ زندگی کے 11برس جیل کی چار دیواری میں گذراچکاہے۔ اپیل کرتا ہے کہ اعلیٰ عدلیہ اور حکومت سزا کے فیصلے پر نظر ثانی کرے تاکہ وہ اعلیٰ تعلیم حاصل کرکے معاشرے کا کار آمد شہری بن سکے۔

انٹر میڈیٹ امتحان میں سید نعیم شاہ کی نمایاں نمبروں سے کامیابی نے ثابت کردیا ہے کہ انسان کی لگن اگر سچی ہو تو درمیان حائل سلاخیں کوئی معنی نہیں رکھتیں