چہرہ نیوز | اردو

ایسی ویسی باتوں پہ کیا رونا ہے

چہرہ ڈیسک

16:22 2021, 5 December

محسن شکیل

 ایسی   ویسی   باتوں   پہ  کیا   رونا   ہے

آگ   لگی  بستی  میں   یہ  تو   ہونا    ہے

گدلے  پانی  سے   دھوئے  تھے  کپڑے، اب

داغ   مجھے  دامن  کا  برسوں  دھونا  ہے

کیا  رکھا  ہے  غور و فکر  کریں جس   پر

پایا  کیا   تھا  جو  اب  ہم  کو  کھونا  ہے

ایک    اداسی   اگنا  ہے   اب  برسوں  تک

فصلِ  غم  ہے   کھیتی میں جو  بونا   ہے

اپنے  آپ  سے  باتیں  کرنا  ہیں  مجھ  کو

میں  ہوں  اور کمرے  کا  پچھلا  کونا  ہے

پوری  رات   گزر  جاتی  ہے   رونے    میں

آدھی  رات ہوئی  اب  مجھ  کو سونا  ہے

گہری  خاموشی  اور  صدمہ   ہے  محسن

اور   اسی  چادر   کا   ایک   بچھونا    ہے