بے گناہ لوگوں کو مارنے میں سندھ پولیس ساواک سے بھی آگے نکل گئی ہے، عوامی تحریک
چہرہ ڈیسک
بے گناہ لوگوں کو مارنے میں سندھ پولیس ساواک سے بھی آگے نکل گئی ہے، عوامی تحریک
نئوں کوٹ عوامی تحریک کے مرکزی رابطہ سیکریٹری لال جروار، اشرف رند، رحمان نہڑی، مارو قاسمانی، امر جلیل، ایاز کلوئی، رمضان کلوئی اور حسن کپری نے نئون ڪوٹ، سنتورو فارم، بچل کلوئی، پریم نگر، کوٹ میر جان محمد سمیت مختلف دیہات کا دورہ کیا اور کارنر پروگراموں میں شرکت کی۔ اس موقع پر خطاب کرتے ہوئے عوامی تحریک کے مرکزی رابطہ سیکریٹری لال جروار اور دیگر رہنماؤں نے کہا کہ ایم کیو ایم کا قاتل اور دہشت گرد ٹولہ مسلم لیگ (ن) کی وفاقی اور پیپلز پارٹی کی صوبائی حکومت کی سرپرستی میں گورنر سندھ کی قیادت میں پانچ سال سے مہذب اور پاکستان کے خالق صوبے سندھ کو ٹکڑے ٹکڑے کرنے کی ملک دشمن مہم چلا رہا ہے۔
انہوں نے کہا کہ پاکستان کی اسٹیبلشمنٹ اور وفاقی حکومت ملک میں شامل چھوٹے صوبوں کے عوام کو دیوار سے لگا کر وسائل پر قبضہ کرنے کی پالیسی پر عمل پیرا ہیں، اور انہی غلط پالیسیوں کے باعث بلوچستان اور خیبر پختونخوا کی صورتحال انتہائی تشویشناک ہو چکی ہے۔ رہنماؤں نے کہا کہ سندھ میں گزشتہ اٹھارہ سال سے پیپلز پارٹی کی حکومت کے دوران کرپشن کے ذریعے صوبائی اداروں کو تباہ کیا گیا ہے۔ پولیس کا ادارہ عوام کے جان و مال کے تحفظ کے بجائے منتخب نمائندوں، وزیروں اور مشیروں کی نجی فورس کے طور پر کام کر رہا ہے۔ پولیس اتنی بے لگام ہو چکی ہے کہ وڈیروں کے اشارے پر بے گناہ لوگوں کو “فل فراء” اور “ہاف فراء” کرنے میں ساواک پولیس سے بھی آگے نکل گئی ہے۔
رہنماؤں نے مزید کہا کہ ڈاکو قبائلی سرداروں کے پالے ہوئے ہیں، جو لوگوں کو اغوا کروا کر کروڑوں روپے کماتے ہیں اور اغوا برائے تاوان ایک گھناؤنا کاروبار بن چکا ہے۔ وفاقی حکومت دریائے سندھ پر نئے نہروں کی تعمیر کا راگ دوبارہ الاپ رہی ہے۔ مسلم لیگ (ن)، پیپلز پارٹی اور اسٹیبلشمنٹ کی ملی بھگت سے پاکستان کے 25 کروڑ عوام کو امریکی سامراج، آئی ایم ایف اور عالمی سامراجی اداروں کے ہاتھوں فروخت کر دیا گیا ہے۔
انہوں نے کہا کہ سندھ میں بدامنی اور لاقانونیت کا راج ہے، جبکہ منتخب نمائندوں اور انتظامیہ کی مدد سے منشیات دکانوں پر عام اشیاء کی طرح فروخت ہو رہی ہیں۔ مزید کہا کہ عوامی تحریک ہمیشہ سندھ کی وحدت، وسائل کی ملکیت، ہاریوں کے حقوق اور زراعت کی تباہی کے خلاف جدوجہد کرتی رہی ہے اور آئندہ بھی ہر قسم کے غیر آئینی اور غیر جمہوری اقدامات کے خلاف سخت مگر پُرامن مزاحمت جاری رکھے گی۔ سندھ کے عوام اپنے حقوق کے تحفظ کے لیے منظم ہوں اور پُرامن جمہوری جدوجہد کو مزید تیز کریں۔
